Wednesday 25 April 2012

باستغرب

باستغرب... 


على اللي يطول دقنه عشان حرام يحلقها لكن اخلاقه مش مهم تكن مهذبة
على اللي عامل فيها شيخ يوعظ الناس بالحلال و الحرام لكن لا يستحرم إنه يشوف مواقع إباحية أو يعاكس بنات على النت و هو متجوز
على اللي بيطالب بالحق و العدل و ينصح الناس بالمعاملة الحسنة لكن عادي إنه يظلم مراته و أولاده
علي اللي يحلف إنه مبيكدبش و  إنه هو الصدق ذاته لكن مش مشكلة لو بيكدب عشان الCV تكن متزوقة أو يكدب في حاجات تانية
على اللي يوعد و يقسم بالله وكل وعوده كلام ملوش لازمة يتبخر أول ما يقوله
على اللي بيكتب و يتكلم على الإسلام و القرآن و هو فيه بيته ملوش علاقة بربه أو دينه
على اللي يبعت طلب إضافة صديق على الفيسبوك لبنت و أول سؤال يسأله ليها انتي مرتبطة و لا لأ كأن ده حيحدد نوع الصداقة 
على اللي عامل نفسه ناصح و له الحق في محاسبة الناس و الشماتة فيهم كأنه الوحيد اللي فاهم كل حاجة 
على اللي عايزة تخرب على الناس عشان بنتها إتفسخت خطوبتها أو بتتطلق فلازم غيرها يبقوا زيها
على اللي متجاهل مراته لا هو بيحبها ولا قادر يعاملها بما يرضي الله و لا عايز يسيبها 
على اللي غاوي يعكنن على الناس و حاشر نفسه في اللي ملوش فيه عشان هو متنكد في حياته و دماغه فاضية
على اللي ينقل كلام غلط و يوقع بين اتنين بدل ما يصلح و ربنا يظهر الحق في الاخر
على اللي يخلف لكن عمره ما ربي
على اللي يشمت في مرض أو مصيبة أو إنفصال بين اتنين و ناسي إن كل حاجة بأمر الله
على اللي بيشتموا في الثورة... مش في عصر فساد و سرقة و  اللي عذبوا الثوار و قتلوا الشهداء...

بقولك إيه؟

نضف نفسك الأول خالص و إشغل نفسك بحالك... وبعدين إشغل نفسك بالاخرين.

 باستغرب اني شفت وعرفت كل دول و لسة عندي أمل و ثقة كبيرة في الخير اللي في الناس.

 وباستغرب عليك و على كل النفاق و  التناقض  اللي فيك... مع إن كلامي مش ليك

يا أخي عيب عليك.

--مروة عياد  

  Marwa Ayad© 

Update

I can't believe it's been this long since I last posted here. Life and everything. In the words of Lana Del Rey, 'But if you wer...